பெயர்

பாக் பக் பக்காக இருக்கலாம்

கொத்துவானாக இருக்கலாம், இல்லை

நாயாகவோ மாரியாத்தாளாகவோ

கூட இருக்கலாம்

சேவலின் பெயர்

கோழியின் பாஷையில்

 

பேசிக் கொண்டே இருக்கும்

‘சள சளா’வாக இருக்கலாம்

ப்ரசவித்த வெம்மை  தீருமுன்

அதன் முட்டையைத் திருடும்

திருடனாக இருக்கலாம்,

அல்லது

கூண்டிலடைக்கப் பட்ட

சுற்றத்தின் முன் அதை

சுடுநீரில் முக்கி சிறகுரித்து

பலவிதமாய் சமைத்துண்டு

திருப்தியாய் ஏப்பம் விடும்

அரக்கனாய் இருக்கலாம்

என் பெயரின் அர்த்தம்

கோழியின் பாஷையில்

 

 

உறைவிடம்

எங்கேயென்று தெரியவில்லை!

பேருந்தின் கூரையில் மழைத்துளி தாளமிட

வெகுதூரம் சென்றது மட்டும்

நினைவில் பொதிந்து ஈரமாய் . . .

நின்ற பேருந்திலிருந்து

தலை தப்ப

ஓடிய சில நொடிகளில்

வேகமாய் மண்டையிலடித்த

துளியின் ஊசிமுனைகளை

இன்னமும் உணரமுடிகிறது!

அதுவரை

கடின முகமணிந்து

ஆங்கிலம் மட்டுமே நடத்தி வந்த

பாகீரதி டீச்சர்

நீர் சொட்டும் தன் கூந்தலை

நுனிமுடிச்சிட்டு

சந்நிதி முன் பாடி, தன்

ஓடு கழற்றிய போது

விடிந்த தினத்தில் தான்

நாங்கள்

நனைந்த புல்வெளியில்

திராட்சை பழம் போட்ட

தயிர் சாதம் சாப்பிட்டது.

சாப்பிட்டு முடிக்கும் போது

வந்த அவசர தகவல்

எங்களுள் ஒருத்தியின்

தந்தை இறந்ததைச் சுமந்திருந்தது.

வெண்மையாய் குழைந்து

கைகளில் ஒட்டியிருந்த

பருக்கைகளைக்

கழுவிய கையுடன்

பயணம் முடிந்து திரும்பி விட்டோம்.

இப்போதும் கூட என்னால்

திராட்சை போட்ட 

தயிர் சாதத்தி லெல்லாம்

மழையை உணர முடிகிறது.

நுனிமுடிச்சில் ஈரம் சொட்ட

பாடியபடி இருக்கும்

பாகீரதி மிஸ்ஸீம்,

அடையாளம் மறந்து போன

தந்தையை யிழந்த மாணவியும் கூட

மழையுடன் சேர்ந்து அதில்

நிரந்தரமாய் உறைந்துவிட்டார்கள்.

 

 

 

 

ஒருவேளை கோப்பி

சல்லடைக் கண்களாய் பூச்சியரித்த
முருங்கைக் கீரையை
ஒரு வெள்ளி இருபது காசுக்கு
வாங்கியிருக்கும் என்னைப் பார்த்து
நீங்கள் சிரிக்கக் கூடும். . . . . .

அதை விற்ற பல்லுதிர்ந்த கிழவன் தன்
பதறும் சரீரத்தை நிலை நிறுத்தி
துரட்டி வைத்து பறித்திருக்கக் கூடிய சாத்தியத்தையும்,
விழப்போகிற இலைகளைப் பொறுக்கும் ஆவலோடு
கண் இடுங்க மேல் நோக்கி பார்த்தபடியிருக்கும்
கோலூன்றிய கிழவி யொருத்தியின் உருவத்தையும்
சித்திரமாய் வரைந்தது,
அவனது மிச்சமிருந்த பற்களின்
இடைவெளி வழி செவியடைந்த.
‘இந்த பணம் என் ஒரு வேளை கோப்பிக்கானது’ என்ற
மொழி கடந்த மலாய் வார்த்தைகள்.

காத்திருந்த கிழவியின் பங்கு கோப்பிக்காய்
இன்னொரு கட்டு கீரை வாங்கிய என்னை
நீங்கள் முட்டாள் என்றும் நினைக்கக் கூடும். . .
பரவாயில்லை!
அவர்கள் இந்நேரம் கோப்பி குடித்திருப்பார்கள்.